TAMAKASI BLOGSPOT (gmidistriktiga.blogspot.com)

LITURGI PELANTIKAN MAJELIS

PENDETA MAN KERINA JEMAAT:

Turang senina ibas kekelengen Yesus Kristsus, ibas paksa sendah kita ngelantik  turang ras seninanta enda si enggo ngaloken pendilo Dibata jadi majelis. Janah ia enggo erpadan  lako nerahken dirina jadi  pelayan ibas jemaat enda. Seh kel jilena adi kita kerina nerahken dirinta  lako jadi pelayan jemaat alu erbage-bage cara, terlebih-lebih alu totonta lako ndukung serayan enda ibas pelayanenna, gelahna pelayanen ibas gerejannta enda seh kel jilena. Jadi arapenta kerina gelahna kita pe saling ngelayani.

PENDETA MAN MAJELIS GEREJA SI MBARU

Turang ras senina, kam enggo ipilih jemaat enda jadi majelis gelah ertanggung jawab ibas pelayanen i jemaat enda. Dahinndu e seh kel mbelinna janah iperluken jemaat enda lako pebelangken kinirajaan Dibata. Erkiteken kam enggo ngaloken lako jadi pelayan ibas jemaat enda ibas kerina bidang, kerina jemaat ngataken bujur man Dibata erkiteken kesiapenndu ibas pendilo enda. Si man ukuren man kita  ijenda kuogeken I KORINTUS 12:12-27

12:12 Bagi sada kula melala ringringna, bage me Kristus e. Amin gia melala ringring e, tapi sada kula nge.

12:13 Bage me pe kita kerina, subuk kalak Jahudi bage pe kalak Junani, subuk budak bage pe kalak si bebas, enggo iperidiken alu Kesah si sada e ku bas sada kula. Ibahan Dibata maka kerina kita enggo minem Kesah si sada e.

12:14 Sabap kula e jadina labo i bas sada ringring nari ngenca tapi jadina i bas melala ringring nari.

12:15 Adi nina nahe, "Erkiteken aku labo tan, e maka aku labo atan i bas kula," maka labo e erbahanca nahe e la atan i bas kula e.

12:16 Bage pe adi nina cuping, "Erkiteken aku labo mata, e maka aku labo atan i bas kula," maka labo si e erbahanca mata e la atan i bas kula e.

12:17 Bicara kerina kula e jadi mata, kuga nge nina megi? Janah bicara kerina kula e cuping, kuga nge nina nganggeh?

12:18 Tapi si tuhuna, Dibata namaken ringring e sada-sadai i bas kula e sue ras si mehuli iakap Dibata.

12:19 Adi kerinana sada erbage saja ngenca, ma la lit kula?

12:20 Tuhu, melala ringring, tapi kula sada nge.

12:21 E maka labo banci nina mata man tan, "Aku la perlu kam!" Bage pe labo banci nina takal man nahe, "Aku la perlu kam!"

12:22 Tapi sebalikna, ringring si tempa-tempa la megegeh e, e nge si la banci langna.

12:23 Ringring si la meherga siakap i bas kula, si e me si lebih sipehaga; janah ringring si mehangke encidahkenca, si e nge si lebih siuisi alu mehuli.

12:24 Tapi ringring si labo mehangke encidahken labo perlu siuisi. Dibata enggo ngaturken kula alu serasi, seh maka ringring si kurang meherga lebih iergaken.

12:25 Gelah kula e la erbelah-belah, tapi sada-sadai ringring e radu seri mperdiateken ringring si deban.

12:26 Adi sada ringring suin, kerina ringring si deban pe ikut nggejapkenca. Janah adi sada ringring ipehaga, kerina ringring si deban ikut ermeriah.

12:27 Kam me kerina kula Kristus janah sekalak-sekalak kam ringringNa.

Bage me pengogen kata Dibata…iarapken maka kita kerina ndalanken dahinta sebagai majelis I gereja enda. Gundari  ilebe-lebe Dibata ras  jemaat enda kusungkun piga-piga penungkunen:

Nggit nge kam ngaloken pendilo Dibata enda janah kam nggit ertanggung-jawab lako ndahiken dahin pelayanen enda ?

Jawab :AKU NGGIT, TUHANLAH SINAMPATI AKU

Nggit nge kam  ngelayani Tuhan alu kerina gegehndu ras usahandu erkite-kiteken kinirajaanNa dan kemuliaanNa ras kehormaten Dibata saja ?

Jawab : AKU NGGIT, TUHANLAH SINAMPATI AKU

PELANTIKEN  (DS ngelantik majelis sada-sadai)

”Kutangkuhken kam jadi majelis.....(gelar gereja)....periode......(tahun periode)...ibas gelar Dibata Bapa, Anak ras Kesah si Badia, Tuhan mereken gegeh man bandu. Amin,-

PENDETA ERTOTO

O Tuhan Dibata kami, raja gereja, ikataken kami bujur  erkiteken kam enggo erpendilo man serayanNdu enda lako erdahin ibas kinirajaaNdu. Berekenlah lias atendu gelana serayanNdu ngasup ndalanken pendahin enda  ibs gerejaNdu. Bereken ukur si tutus ras semangat si ibas kam nari  gelahNa pelayanenna sentudu ras perateNdu. Kuasailah ia gelahna, pasu-pasulah rumah tanggana, janah bereken kesehaten ras gegeh man ia gelahna ia banci jadi usihen ras ngasup ndahiken pelayanen si mbelin enda.

Bapa begiken min pertoton kami , ibas gelar Yesus, Raja gereja kami ertoto. Amin,-

PENDETA MAN JEMAAT

Turang ras senina, alu erpengendes man Dibata kita ngaloken turang ras seninanta enda lako ngelayani sebagai majelis  gerejanta enda. Sampati janah totoken ia gelahna jadi sada pasu-pasu ibas pelayanen ibas gerejanta. Marilah kita ras-ras ngelayani Tuhan  ras kinirajaanNa.

( kerina majelis erjimpuh, janah pendeta notoken ia)

PENDETA ERTOTO

Tuhan, alokenlah persembahen diri kami, anak-anakNdu enda, ieteh kami kami enggo ngaloken mbua pasu-pasu ibas Kam nari janah kami tetap kap ibas pemeliharaaNdu. Alokenlah Bapa, persembahen si kitik ibas anak-anakNdu enda nari. Lias ate ibas Tuhan kita Yesus Kristus nari, kekelengen Dibata Bapa, ras persadaan ibas kesah si badia nari lah sinampati kam kerina.

( Pendeta nalami kerina, janah mpetandaken majelis enda ku jemaat, jemaat cinder lako ngalo-ngalosa)